संस्कृति और परम्परा, कोनो भी जाती, खन्दान तथा वंशके पहिचान चियै । संस्कृतिके लोप हेतै कोनो भी वंश तथा खान्दानके पहिचान मे प्रश्न उईठ सकैछै । तेही दुआरे अपन संस्कृति और परम्पराके संरक्षण तथा सम्बर्द्धनके बात करैत हमरा बहुत गौरव महसुस भ्यारहल छै ।

        जातीय संस्कृतिके सन्दर्भमे हमसब थौर चियै । थौर कहैत हमरौरेके खुशी लागये। वंशजके सन्दर्भमे हमरौरके मूल पीतामह पुज्यवर श्रध्येय श्री बरियार माईझके सन्तान चियै । माने माईक (मानराजा), पाते माईक (पताईर पोरैर, निर्माता) यही खन्दानके गौरवमय व्यक्तित्व सब चियै । पूर्वकालमे शिक्षा दिक्षावे अभाव के कारण हमर पुर्खा सब आपन वंशके इतिहासके बारेमे वैज्ञानिक खोज तलाश और उचित विचारके विकास नई क्या सकलकै। ताव नै यै सम्बन्धमे कोनो लिखितो नै प्रकाशित क्या शकल कै । येकर परिणाम आई हमरा सबके वंशके बारेमे बहुत कम जानकारी छै । जेनङ की थारु समाजमे विभिन्न लोक विभिन्न गांव और थाक वंशके हैतो मैथिली ब्रहमणके वलधकेल से सबके गोत्र एकेटा भ्याल जहांइत लागेछै । यैके अलावा कोनोभी थाक वंशके कयाक नै है सबके नामके अन्तमे चौधरी लिखल जाई । जेकर परिणाम भविष्यमे बहुत खराब भ्या सकैछै । कोई केकरो दियाद के पहिचान नै रहतै ओइ अवस्थामे भाई बहिन मे शादी विवाह भ्या सकैछै। तही दुआरे आई सबसे जरूरी बात चीयै जे आपन थाक वंशके चिनारी के लेल एकटा प्रतिक शब्द अर्थात् थर लिखनाई जरुरी छै ।

       हरेक कमी कमजोरीके बाबजूद हमर खन्दान " विलु गंगाराम" के नामसे परिचित तथा संगठित चियै । आईतक विलु गंगाराम हमर वंशके पहिचानके प्रतिकके रुपमे स्थापित भ्याल छै ।

       मगर अनुसन्धान करलापर विभिन्न प्रमाणके आधारमे एकटा वात प्रमाणित छै जे श्रध्येय बरियार माईझ यै वंशके १६ वाँ पुस्ता तथा ४०० वर्ष पुरान मूलपितामह के रुपमे भेट रहल छै । तै हेतु आपन दियाद सबके सम्पूर्ण सदस्यके समेटके राखैके लेल थर के रुपमे भावी सन्तानके नामके अन्तमे चौधरी के जगह मे " बरियार” शब्द लिखनाई अत्यन्त जरुरी और बहुत महत्वपूर्ण निर्णय चियै ।

       यै अभियानके सफल कैरके लेल बरियार माईझ परिवारके सम्पूर्ण सदस्य सबके अहम कर्तव्य भेलाके कारण सबके सब मिलके तन, मन, धन और कर्मसे सहयोग तथा अग्रसर हैले हम विनम्रता पूर्व क अनुरोध करैचियै । धन्यवाद । खड्ग नारायण चौधरी (अधिवक्ता) संस्थापक अध्यक्ष बिलु गंगाराम सेवा समिति